बुलढाणा ( लिंक मराठी ) -:
राज्य सरकारच्या महत्वाकांक्षी “लाडकी बहीण” योजनेच्या अंमलबजावणीदरम्यान गैरप्रकारांना आळा घालण्यास सुरुवात झाल्याचे संकेत मिळाले आहेत. योजनेचा गैरफायदा घेतल्याचे निष्पन्न झालेल्या एका लाभार्थीकडून बुलढाणा जिल्ह्यात वसुली करण्यात आल्याची माहिती अधिकृत सूत्रांकडून मिळत आहे.
प्राथमिक तपासात संबंधित लाभार्थीने पात्रतेच्या निकषांमध्ये बसत नसतानाही चुकीची माहिती सादर करून योजनेचा लाभ घेतल्याचे समोर आले. त्यानंतर प्रशासनाने नियमानुसार कार्यवाही करत चुकीने घेतलेली रक्कम परत वसूल केली आहे. ही कारवाई लाडकी बहीण योजनेअंतर्गत झालेली राज्यातील पहिली ठोस वसुली असल्याचे सांगितले जात आहे.
महत्वाचे म्हणजे, सरकारकडून यापूर्वीच स्पष्ट करण्यात आले होते की, पात्र लाभार्थींनाच योजनेचा लाभ दिला जाईल आणि चुकीची माहिती देऊन लाभ घेतल्यास संबंधितांवर कारवाई करण्यात येईल. बुलढाणा येथील ही कारवाई त्या इशाऱ्याचे प्रत्यक्ष उदाहरण मानले जात आहे.
दरम्यान, या घटनेनंतर प्रशासनाने राज्यभर लाभार्थ्यांच्या कागदपत्रांची आणि माहितीची पुन्हा एकदा छाननी करण्याचे संकेत दिले आहेत. यामुळे भविष्यात अपात्र लाभार्थ्यांवर कारवाई वाढण्याची शक्यता व्यक्त केली जात आहे.
लाडकी बहीण योजनेचा लाभ घेताना पात्रतेची अचूक माहिती देणे आवश्यक असून, नियमांचे उल्लंघन केल्यास वसुलीसह कायदेशीर कारवाई होऊ शकते, असा स्पष्ट संदेश या कारवाईतून दिला गेला आहे.
मुख्यसंपादक
