आजरा घनसाळ शुद्ध बियाणे निर्मितीसाठी शेतकरी मेळावा; ८ जून रोजी आजऱ्यात आयोजन

आजरा ( प्रतिनिधी ) -:
कोल्हापूर जिल्हा परिषदेकडून यावर्षी विविध नावीन्यपूर्ण कृषी योजना राबविण्याचे नियोजन करण्यात आले असून, देशी वाणांचे संवर्धन आणि जतन करण्याच्या उद्देशाने आजरा घनसाळ शुद्ध बियाणे निर्मितीस प्रोत्साहन देणारी विशेष योजना हाती घेण्यात आली आहे. या योजनेच्या अनुषंगाने आजरा तालुक्यातील घनसाळ उत्पादक शेतकऱ्यांचा मेळावा सोमवार, दि. ८ जून रोजी दुपारी १ वाजता आयोजित करण्यात आला आहे.
हा मेळावा मृत्युंजयकार कै. शिवाजीराव सावंत स्मृतीदालन, आजरा येथे होणार असून, घनसाळ भात लागवड, शुद्ध बियाणे निर्मिती, देशी वाणांचे संवर्धन तसेच आधुनिक शेती तंत्रज्ञान या विषयांवर विविध तज्ज्ञ मान्यवरांचे मार्गदर्शन शेतकऱ्यांना मिळणार आहे.
या कार्यक्रमास जिल्हा परिषदेच्या अध्यक्षा, उपाध्यक्षा, विविध समित्यांचे सभापती, मुख्य कार्यकारी अधिकारी तसेच अन्य मान्यवर अधिकारी व लोकप्रतिनिधी उपस्थित राहणार आहेत. त्यांच्या हस्ते घनसाळ भात संवर्धनाबाबत विविध उपक्रमांची माहिती शेतकऱ्यांना दिली जाणार आहे.
आजरा घनसाळ हा तालुक्याची ओळख बनलेला पारंपरिक व दर्जेदार भाताचा वाण असून, त्याचे शुद्ध बियाणे संवर्धन आणि उत्पादन वाढीसाठी जिल्हा परिषद विशेष प्रयत्न करत आहे. या उपक्रमामुळे घनसाळ उत्पादक शेतकऱ्यांना दर्जेदार बियाणे निर्मिती, अधिक उत्पादन आणि चांगली बाजारपेठ उपलब्ध होण्यास मदत होणार असल्याचे सांगण्यात आले.
तालुक्यातील जास्तीत जास्त घनसाळ उत्पादक शेतकऱ्यांनी या मेळाव्यास उपस्थित राहून मार्गदर्शनाचा लाभ घ्यावा, असे आवाहन पंचायत समिती सभापती सौ. जयश्री गाडे, उपसभापती सौ. यशोदा पोवार, जिल्हा परिषद सदस्य सुधीर देसाई, शिरीष देसाई, गटविकास अधिकारी सुभाष सावंत आणि कृषि अधिकारी दिनेश शेटे यांनी केले आहे.
📌 ठळक मुद्दे
✅ आजरा घनसाळ शुद्ध बियाणे निर्मितीसाठी विशेष योजना
✅ शेतकरी मेळावा – ८ जून २०२६, दुपारी १ वाजता
✅ स्थळ – कै. शिवाजीराव सावंत स्मृतीदालन, आजरा
✅ कृषी तज्ज्ञांचे मार्गदर्शन
✅ घनसाळ संवर्धन व शेतकरी उत्पन्नवाढीवर भर
– Link Marathi | काल • आज • उद्या

अमित गुरव

मुख्यसंपादक