आई ग तू बाराखडी
शिकलीस ना?
तुझी आणि बाबांची
बाराखडी सारखीच
होती का ग?
नसावी बहुतेक
कारण
मला आणि दादाला
तू वेगवेगळी
बाराखडी शिकवलीस
मला म्हणालीस अ अदबीचा
त्याला अ अहंकाराचा
माझा आ आवराआवरीचा
त्याचा आरामाचा
माझा उ उरकण्यातला
त्याचा उ उडण्यातला
क कामाचा, ख खलबत्त्याचा
असे शिकवत होतीस मला
मला कधीतरी सांगितलेस का ग
क असतो कर्तबगारीचा आणि
ख खेळण्याबागडण्याचा…
त्यालाही सांगायला हवे होतेस
न नात्याचा आणि
स सन्मानाचा असतो
आणि ज असतो जबाबदारीचा
बघ ना जरा बाराखडी बदलून
आणि बाबालाही सांगशील
नवीन बाराखडी शिकवायला
त्याच्या वागण्यातून
बदलेल कदाचित सारे जग
कदाचित…
- समिधा ययाती गांधी
![](http://linkmarathi.com/wp-content/uploads/2021/09/WhatsApp-Image-2021-09-14-at-5.30.29-PM.jpeg)
मुख्यसंपादक
mazya manatale tumhi lihalat