|| दाणे नसलेल्या कणसांना ||

तो कुठे जुमानतोय
पाठीवर मारल्या फत्तरांना
शोधत फिरतोय
आयुष्यास ग्रासलेल्या
प्रश्नांच्या उत्तरांना

व्यवस्थेच्या हातात खुंटा असलेल्या
भरडग्यात
भरडला जातोय तो
कधी जाड तर कधी बारीक
दळला जातोय तो

कित्येक वर्षाचा भोगून वनवास
अजूनही तो जगतोय कसा
नांगराचा फाळ मातीत
झिजून जावा तसा

तिष्ठतच राहतोय तो न्यायासाठी
स्वातंत्र्यात जगतांना
कसा मिळेल न्याय
किक्रेटच्या चेंडूवर आणि
नेत्याच्या भाषणावर
टाळ्या वाजवणाऱ्या अवलादी
पोटी असतांना

कसे मिळतील उत्तरे?
प्रश्नच माहित नसलेल्या माणसांना
साधे पाखरूही शिवत नाही
दाणे नसलेल्या कणसांना

संतोष पाटील

अमित गुरव

मुख्यसंपादक